Internal Applicants Only - School Technician presso Cardiff University

Mae'r swydd hon ar agor i weithwyr Prifysgol Caerdydd yn unig ar hyn o bryd.  Peidiwch ymgeisio os nad oes ganddoch gytundeb cyflogaeth ddilys gyda’r brifysgol.

Ymgeiswyr Mewnol yn Unig - Technegydd Ysgol
Yr Ysgol Meddygaeth
Coleg y Gwyddorau Biofeddygol a Gwyddorau Bywyd

Mae'r Ysgol Meddygaeth, sydd wedi'i lleoli yn Adeilad Hadyn Ellis, yn chwilio am Dechnegydd labordy i weithio’n rhan o dîm technegol craidd sy'n darparu cefnogaeth dechnegol ar y safle yn rhan o’r Ysgol Meddygaeth, gan ddarparu cyngor, arweiniad ac arbenigedd technegol arbenigol i'r gymuned ymchwil. 

Mae Prifysgol Caerdydd yn cynnig llawer o fanteision rhagorol, gan gynnwys 40 diwrnod o wyliau blynyddol (gan gynnwys gwyliau banc), cynllun pensiwn lleol, cynllun beicio i'r gwaith a mentrau teithio eraill, cynyddrannau blynyddol o fewn y raddfa gyflog, a mwy.  Dyma le cyffrous a bywiog i weithio lle mae llawer o heriau gwahanol. Mae’r Brifysgol hefyd yn falch o gefnogi’r Cyflog Byw.

Cysylltwch ag Emma Dalton, Rheolwr Labordai ([email protected]), am drafodaeth anffurfiol, gyfrinachol am y rôl.

Swydd amser llawn a phenagored (35 awr yr wythnos) yw hon ac mae modd dechrau ar unwaith.

Cyflog: £25,249 – £26,093 y flwyddyn (Gradd 3)  Fel arfer, bydd pobl a benodir ym Mhrifysgol Caerdydd yn dechrau ar waelod y raddfa gyflog, heblaw o dan amgylchiadau eithriadol.

Dyddiad cau: Dydd Mawrth, 30 Medi 2025

Nid yw ceisiadau allanol yn cael eu hystyried ar gyfer y swydd hon ar hyn o bryd.  Os penderfynir agor y swydd i ymgeiswyr allanol, bydd yr isbennawd ar y brig yn cael ei thynnu a rhoddir digon o amser i chi wneud cais - cadwch olwg ar y dudalen am fanylion.

Mae Prifysgol Caerdydd wedi ymrwymo i gefnogi a hyrwyddo cydraddoldeb ac amrywiaeth a sicrhau diwylliant gwaith cynhwysol. Rydym o’r farn bod modd gwneud hyn drwy ddenu, datblygu a chadw ystod amrywiol o bobl o lawer o gefndiroedd gwahanol. Felly, rydym yn croesawu ceisiadau gan bobl o bob rhan o’r gymuned, beth bynnag fo’u rhyw, eu hethnigrwydd, eu hanabledd, eu cyfeiriadedd rhywiol, eu hunaniaeth draws, statws eu perthynas, eu crefydd neu eu cred, eu cyfrifoldebau gofalu neu eu hoedran.  Er mwyn cefnogi ein gweithwyr i gael cydbwysedd rhwng eu gwaith a'u bywyd personol, byddwn hefyd yn ystyried cynigion i rannu’r swydd neu weithio'n hyblyg.

Mae modd cyflwyno ceisiadau yn Gymraeg, ac ni chaiff cais a gyflwynir yn Gymraeg ei drin yn llai ffafriol na chais a gyflwynir yn Saesneg.

Rhoi cymorth technegol proffesiynol i’r Ysgol Meddygaeth.

Dyletswyddau a Chyfrifoldebau

Prif Ddyletswyddau

Darparu gwasanaeth i staff a myfyrwyr drwy gynnal a chadw, gwasanaethu ac atgyweirio deunyddiau, peiriannau ac offer i gefnogi adrannau ymchwil mewn amgylcheddau labordy yn yr Ysgol Meddygaeth, gan gynghori a hyfforddi staff a myfyrwyr ar eu defnydd diogel a phriodol gan ddefnyddio canllawiau sefydledig (Gweithdrefnau Gweithredu Safonol)
Paratoi'r holl ddeunyddiau a chyfarpar yn ôl yr angen i’w defnyddio gan gwsmeriaid a sicrhau bod y man rydych yn gyfrifol amdano’n cael ei gadw’n lân ac yn daclus

Rheoli stoc, gan sicrhau bod lefel y stoc yn cael ei chynnal a bod y stoc yn cael ei diogelu’n ddigonol a’i dosbarthu yn ôl yr angen

Delio ag ymholiadau cyffredinol gan gwsmeriaid mewnol ac allanol mewn modd proffesiynol, gan ddilyn gweithdrefnau sydd ar waith, cyfeirio ymholiadau cymhleth at yr aelodau perthnasol o’r staff a sicrhau bod yr holl ffeithiau a gwybodaeth angenrheidiol yn cael eu cofnodi a'u trosglwyddo i’r bobl briodol

Helpu i gadw cofnodion cyffredinol, diweddaru cronfeydd data a dadansoddi data/gwybodaeth gyffredinol yn ôl yr angen

Cofnodi canlyniadau arbrofion mewn fformat hawdd ei ddefnyddio a'i gyflwyno, a helpu staff a myfyrwyr i baratoi deunyddiau/data technegol ar gyfer y dyfodol, e.e. at ddibenion addysgu neu gyhoeddi

Cynllunio a rheoli prosiectau bach, gan wneud yn siŵr bod adnoddau'n cael eu defnyddio'n effeithiol

Cymryd rhan flaenllaw yng ngwaith y tîm, gan osod esiampl a dangos ymagwedd hyblyg at gyflawni canlyniadau'r tîm

Dyletswyddau Cyffredinol

Sicrhau eich bod yn defnyddio eich dealltwriaeth o bwysigrwydd cyfrinachedd wrth gyflawni pob dyletswydd

Cadw at bolisïau’r Brifysgol ar Iechyd a Diogelwch a Chydraddoldeb ac Amrywiaeth

Cyflawni dyletswyddau eraill o bryd i'w gilydd nad ydynt wedi'u cynnwys uchod, ond sy'n cyd-fynd â'r rôl
 

26,093

Gradd 3

25,249

Meddygol & Deintyddol, Technegol

Sut byddwn yn eich cefnogi i gyflawni’r swydd hon –

Mae’n rhaid ichi fodloni rhai gofynion cyn gallu dechrau’r swydd (gweler yr adran ‘Meini Prawf Hanfodol’), ond bydd modd datblygu sgiliau eraill drwy gael hyfforddiant neu brofiad cyffredinol yn y gwaith.  Rydym yn awyddus i'ch cefnogi a’ch datblygu ar ôl ichi ddechrau yn y swydd gan ddefnyddio cyfuniad o’r canlynol er mwyn sicrhau eich bod yn gallu rhoi o’ch gorau:

1.    Cyfarfodydd un i un rheolaidd gyda'ch rheolwr
2.    Tîm profiadol a chefnogol o'ch cwmpas
3.    Cefnogi’r hyfforddiant a’r datblygiad sy'n berthnasol i'ch swydd ac y bydd ei angen arnoch o bosibl

Gwybodaeth ychwanegol

PWYSIG: Tystiolaeth o Feini Prawf

Mae'n bolisi gan yr Ysgol Meddygaeth ddefnyddio manyleb yr unigolyn yn adnodd allweddol wrth ddethol pobl ar gyfer y rhestr fer. Dylai’r ymgeiswyr ddangos tystiolaeth eu bod yn bodloni’r HOLL feini prawf hanfodol, yn ogystal â’r meini prawf dymunol, pan fo hynny’n berthnasol. Yn rhan o’r broses ymgeisio, bydd gofyn ichi roi’r dystiolaeth hon ar ffurf datganiad ategol.

Wrth gyflwyno'r ddogfen hon/ei hatodi i broffil eich cais, cofiwch roi cyfeirnod y swydd wag yn y teitl. Yn achos y swydd hon, y cyfeirnod yw 20458BR

Os na fydd ymgeiswyr yn cyflwyno tystiolaeth ysgrifenedig sy’n dangos eu bod yn bodloni pob un o’r meini prawf hanfodol, ni fydd eu cais yn symud ymlaen. Mae'r Ysgol Meddygaeth yn croesawu derbyn CVs i ategu tystiolaeth o feini prawf y swydd.
 

Technegol